پاکستان ریڈ کریسنٹ سوسائٹی (پی آر سی ایس) کی چیئرپرسن محترمہ فرزانہ نائیک نے اسلام آباد میں ترک ریڈ کریسنٹ کے دفتر کا دورہ کیا، جہاں اُنہوں نے پاکستان میں ترک ریڈ کریسنٹ کے قائم مقام سربراہ ارکان ایوچی سے ملاقات کی۔ اس ملاقات میں انسان دوست خدمات کے فروغ اور دونوں اداروں کے درمیان تعلقات کو مزید مضبوط بنانے پر تبادلۂ خیال کیا گیا۔
ارکان ایوچی نے پی آر سی ایس کی چیئرپرسن کی بصیرت افروز قیادت اور پاکستان میں ترک ریڈ کریسنٹ کے زیر اہتمام پروگرامز کی مسلسل حمایت کو سراہا۔ انہوں نے دونوں اداروں کے درمیان قریبی تعاون کو اہم قرار دیا۔ اس موقع پر فرزانہ نائیک نے بھی ترک ریڈ کریسنٹ کی پاکستان میں انسان دوست سرگرمیوں کی تعریف کی اور معاشرتی طور پر کمزور طبقات کی بہتری کے لئے تعاون کے عزم کا اعادہ کیا۔
دونوں رہنماؤں نے اس بات پر اتفاق کیا کہ انسانی خدمت کے اس سفر میں مل جل کر کام کرنا ایک روشن مستقبل کی ضمانت ہے۔ اداروں کے اس اشتراک سے ملک بھر میں ضرورت مند لوگوں کی فلاح و بہبود کے جدید اقدامات کو فروغ ملے گا۔
