اسلام آباد میں وزارت مذہبی امور کے سیکریٹری ڈاکٹر سید عطا الرحمٰن کی زیر صدارت ایک اہم اجلاس منعقد ہوا جس میں حج 2026 کی ابتدائی تیاریوں سے متعلق مختلف امور پر غور کیا گیا۔ اس اجلاس کا مقصد پاکستانی حجاج کو آئندہ حج میں بہتر سہولیات اور منظم انتظامات فراہم کرنے کے اقدامات پر مشاورت تھا۔
اجلاس میں وزارت کے ایڈیشنل سیکریٹری ڈاکٹر ساجد محمود چوہان سمیت دیگر سینئر افسران نے شرکت کی۔ شرکاء نے حالیہ حج کے دوران سامنے آنے والے تجربات کی روشنی میں رہائش، ٹرانسپورٹ اور دیگر انتظامات کو مزید بہتربنانے کیلئے سفارشات پیش کیں۔
وزارت مذہبی امور نے اس بات کا عزم ظاہر کیا کہ وہ بروقت اور مؤثر تیاریوں کے ذریعے پاکستانی حجاج کو ایک منظم، پُرسہولت اور یادگار حج کا تجربہ فراہم کرنے کے لیے بھرپور اقدامات کرے گی۔
